દિવાળીના તહેવારોની તૈયારીઓ જ્યારે જોરશોરથી ચાલી રહી છે, ત્યારે હવામાન નિષ્ણાત અંબાલાલ પટેલે એક એવી આગાહી કરી છે જે તહેવારોના રંગમાં ભંગ પાડી શકે છે. અંબાલાલ પટેલના જણાવ્યા મુજબ, આગામી દિવસોમાં ગુજરાતના વાતાવરણમાં મોટો પલટો આવવાની શક્યતા છે, જેમાં દિવાળીની આસપાસ કમોસમી વરસાદ (માવઠું) અને ત્યારબાદ ઠંડીનો વહેલો પ્રારંભ થવાના સંકેતો છે.
અંબાલાલ પટેલની આગાહી મુજબ, આગામી 5થી 7 દિવસમાં રાજ્યના વાતાવરણમાં પલટો આવશે અને પવન ફૂંકાવાનું શરૂ થશે. ખાસ કરીને 17 અને 18 ઓક્ટોબરના રોજ હવામાનમાં મોટા ફેરફારની પૂરી શક્યતા છે.
દિવાળીના તહેવાર પર માવઠાનું સંકટ
અંબાલાલ પટેલની આગાહી પ્રમાણે, લગભગ દિવાળીની આસપાસ એટલે કે 18 ઓક્ટોબરથી 30 ઓક્ટોબર સુધીમાં ગુજરાતના હવામાનમાં પલટો આવી શકે છે અને રાજ્યના કેટલાક ભાગોમાં માવઠું થવાની સંભાવના છે. તેમણે ખાસ ચેતવણી આપી છે કે દિવાળીમાં લીધેલા ફટાકડા પલળી ન જાય તેનું ધ્યાન રાખવું પડે તેવી સ્થિતિ સર્જાઈ શકે છે. આ ઉપરાંત, 17 ઓક્ટોબરથી દરિયા કિનારે ભારે પવન ફૂંકાવાની પણ તેમણે આગાહી કરી છે.
બંગાળના ઉપસાગરમાં સિસ્ટમ સક્રિય, વાવાઝોડાની પણ શક્યતા
આ કમોસમી વરસાદ પાછળનું મુખ્ય કારણ બંગાળના ઉપસાગરમાં સક્રિય થઈ રહેલી સિસ્ટમ છે. અંબાલાલ પટેલના જણાવ્યા મુજબ:
- 18 થી 20 ઓક્ટોબર વચ્ચે બંગાળના ઉપસાગરમાં એક લો-પ્રેશર સિસ્ટમ બનવાની શક્યતા છે, જે ધીમે ધીમે ચક્રવાતમાં ફેરવાઈ શકે છે.
- આ જ સમયગાળા દરમિયાન, એટલે કે 18 થી 21 ઓક્ટોબર વચ્ચે અરબ સાગરમાં પણ અસામાન્ય હલચલ જોવા મળશે.
- પૂર્વીય દેશોમાંથી આવતા ટ્રાયફૂનના અવશેષો અને MJO (મેડન જુલિયન ઓસીલેશન) ની સક્રિયતાને કારણે 18 ઓક્ટોબર બાદ દેશ અને રાજ્યના હવામાનમાં મોટો પલટો આવી શકે છે.
ક્યારથી શરૂ થશે ઠંડીનો ચમકારો?
અંબાલાલ પટેલ દ્વારા ઠંડીનો ચમકારો વહેલો શરૂ થવાની વાત કરવામાં આવી છે. તેમના મતે, 24 ઓક્ટોબરથી ઠંડીનો પહેલો ચમકારો અનુભવાશે, જેની શરૂઆત 23 ઓક્ટોબરથી ફૂંકાતા ઠંડા પવનોથી થશે. ધીમે ધીમે ગરમી ઘટતી જશે અને સાંજના વાતાવરણમાં ઠંડકનો અહેસાસ થવા લાગશે.
નવેમ્બર-ડિસેમ્બરમાં પણ વાતાવરણમાં રહેશે પલટો
આગાહી મુજબ, હવામાનમાં પલટાનો આ દોર નવેમ્બર અને ડિસેમ્બર સુધી ચાલુ રહી શકે છે.
- નવેમ્બરની શરૂઆતમાં: ઉત્તરના પર્વતીય વિસ્તારોમાં હિમવર્ષાની શક્યતા છે, જેના કારણે ઠંડી વહેલી શરૂ થઈ શકે છે.
- 18 નવેમ્બરથી: બંગાળના ઉપસાગરમાં બીજું ભારે વાવાઝોડું ફૂંકાવાની શક્યતા છે, જેની અસર ગુજરાતના હવામાન પર પડી શકે છે.
- 23 અને 26 નવેમ્બર: આ તારીખોની આસપાસ પણ રાજ્યના હવામાનમાં પલટો આવી શકે છે.
અંબાલાલ પટેલના મતે, ડિસેમ્બર મહિના સુધી ચક્રવાતોની સક્રિયતા ચાલુ રહેવાની પૂરી શક્યતા છે, જેનો અર્થ છે કે આગામી સમયમાં હવામાન અનિશ્ચિત રહી શકે છે.
