Child Train Ticket : દિવાળીના તહેવારો નજીક આવી રહ્યા છે અને ઘણા પરિવારો વેકેશનમાં ટ્રેન દ્વારા મુસાફરી કરવાનું આયોજન કરી રહ્યા છે. જો તમે પણ તમારા બાળકો સાથે ટ્રેનમાં મુસાફરી કરવાના હો, તો ટિકિટ બુક કરાવતા પહેલાં ભારતીય રેલવેના નિયમો જાણવા ખૂબ જ જરૂરી છે. ઘણા લોકોને એ વાતની ગૂંચવણ હોય છે કે કેટલી ઉંમરના બાળકની ટિકિટ લેવી પડે, ક્યારે અડધી ટિકિટ લાગે અને કેટલી ઉંમરનું બાળક મફતમાં મુસાફરી કરી શકે? ભારતીય રેલવેએ મુસાફરોની સુવિધા માટે બાળકો, મહિલાઓ અને વરિષ્ઠ નાગરિકો માટે કેટલાક ખાસ નિયમો બનાવ્યા છે. ચાલો, આજે આપણે બાળકોની ટિકિટને લગતા નિયમો વિશે વિસ્તારથી જાણીએ.
1 થી 4 વર્ષના બાળકો માટે કેટલી ટિકિટ લેવી પડશે? – Child Train Ticket
ભારતીય રેલવેના નિયમો અનુસાર, જો તમારા બાળકની ઉંમર 1 થી 4 વર્ષની વચ્ચે છે, તો તમારે તેના માટે કોઈ ટિકિટ લેવાની જરૂર નથી. આ ઉંમરના બાળકો ટ્રેનમાં મફતમાં મુસાફરી કરી શકે છે. જોકે, અહીં એ વાતનું ખાસ ધ્યાન રાખવું કે મફત મુસાફરીમાં બાળકને અલગથી કોઈ સીટ કે બર્થ ફાળવવામાં આવતો નથી. બાળકે તેની સાથે મુસાફરી કરી રહેલા પુરુષ કે મહિલા વ્યક્તિની સીટ પર જ બેસવાનું હોય છે. જો તમે તમારા નાના બાળક માટે આરામદાયક મુસાફરી ઈચ્છો છો અને અલગ સીટ મેળવવા માંગો છો, તો તમારે તેના માટે પૂરી ટિકિટ ખરીદવી પડશે.
5 થી 12 વર્ષના બાળકો માટે: કેટલી ટીકીટ લેવી પડે?
જો તમારા બાળકની ઉંમર 5 થી 12 વર્ષની વચ્ચે હોય, તો તેના માટે અડધી ટિકિટ લેવી ફરજિયાત છે. પરંતુ, અહીં એક સામાન્ય ગેરસમજ એ છે કે અડધી ટિકિટ લેવાથી બાળકને અલગ સીટ મળશે. રેલવેના નિયમ મુજબ, અડધી ટિકિટ પર બાળકને અલગ બર્થ કે સીટ ફાળવવામાં આવતી નથી. આ કિસ્સામાં પણ, બાળકે તેની સાથેના પુખ્ત મુસાફરની સીટ પર જ મુસાફરી કરવી પડે છે.
જો તમે ઈચ્છો છો કે 5 થી 12 વર્ષના બાળકને મુસાફરી માટે અલગથી આખી સીટ મળે, તો તમારે તેની અડધી ટિકિટને બદલે પૂરી ટિકિટ ખરીદવી પડશે. ટિકિટ બુક કરાવતી વખતે આ વિકલ્પ પસંદ કરી શકાય છે.
12 વર્ષથી વધુ ઉંમરના બાળકો માટે શું નિયમ છે?
જો બાળકની ઉંમર 12 વર્ષ પૂરી થઈ ગઈ હોય અને તે 13 વર્ષનું કે તેથી વધુ ઉંમરનું હોય, તો તેના માટે પુખ્ત વયના વ્યક્તિની જેમ જ પૂરી ટિકિટ લેવી ફરજિયાત છે. આ ઉંમરના બાળકો માટે અડધી ટિકિટનો નિયમ લાગુ પડતો નથી.
મુસાફરી દરમિયાન આટલું ધ્યાન રાખો
- દંડથી બચો: જો તમારું બાળક 5 વર્ષથી મોટું છે અને તમે તેની ટિકિટ લીધા વગર મુસાફરી કરી રહ્યા છો, તો ટિકિટ ચેકર (TTE) દ્વારા તમને દંડ ફટકારવામાં આવી શકે છે.
- ઉંમરનો પુરાવો સાથે રાખો: ખાસ કરીને 4 વર્ષથી ઓછી ઉંમરના બાળકો માટે, તેમની ઉંમર સાબિત કરવા માટે મુસાફરી દરમિયાન જન્મનું પ્રમાણપત્ર અથવા અન્ય કોઈ આઈડી પ્રૂફ સાથે રાખવું હિતાવહ છે. ટિકિટ બુકિંગ સમયે પણ નિયમોનો ખોટો ફાયદો ન ઉઠાવવામાં આવે તે માટે રેલવે દ્વારા ઉંમરના પુરાવા માંગવામાં આવી શકે છે.