Sanchar Saathi : આજના ડિજિટલ યુગમાં, આપણો મોબાઈલ નંબર માત્ર વાતચીત કરવાનું સાધન નથી, પરંતુ આપણી ઓળખનો એક મહત્વપૂર્ણ ભાગ છે. પરંતુ, શું તમે ક્યારેય વિચાર્યું છે કે તમારી જાણ બહાર તમારા નામે કોઈ સિમ કાર્ડ વાપરી રહ્યું હોય? જો તમારા નામે જારી કરાયેલ સિમ કાર્ડનો ઉપયોગ કોઈ સાયબર ક્રાઇમ કે ગેરકાયદેસર પ્રવૃત્તિ માટે થાય, તો તમે મોટી મુશ્કેલીમાં ફસાઈ શકો છો. આ ગંભીર સમસ્યાથી બચવા માટે, સરકારે એક ખૂબ જ સરળ અને અસરકારક પોર્ટલ શરૂ કર્યું છે, જેના દ્વારા તમે ઘરે બેઠા માત્ર બે મિનિટમાં જ જાણી શકો છો કે તમારા આધાર કાર્ડ પર કેટલા સિમકાર્ડ લીધેલા છે અને નકામા નંબરને તરત જ બંધ કરાવી શકો છો.
શું છે સંચાર સાથી પોર્ટલ? – Sanchar Saathi
આ પ્રકારની છેતરપિંડી રોકવા અને નાગરિકોની સુરક્ષા વધારવા માટે, ભારત સરકારે ‘સંચાર સાથી પોર્ટલ’ (Sanchar Saathi Portal) લોન્ચ કર્યું છે. આ ઓનલાઈન સુવિધાનો મુખ્ય હેતુ એ છે કે કોઈપણ વ્યક્તિ પોતાના નામે કેટલા સિમ કાર્ડ એક્ટિવ છે તેની સંપૂર્ણ જાણકારી મેળવી શકે છે. આ પોર્ટલ તમને તમારા નામે ચાલતા અજાણ્યા નંબરોને ઓળખીને તેને બ્લોક કરવાની સુવિધા પણ આપે છે.
કેવી રીતે ચેક કરશો તમારા નામે ચાલતા નંબરો?
તમારા નામે કેટલા સિમ કાર્ડ રજિસ્ટર્ડ છે તે જાણવાની પ્રક્રિયા ખૂબ જ સરળ છે. નીચે આપેલા સ્ટેપ્સને અનુસરો:
- પોર્ટલ પર જાઓ: સૌથી પહેલાં, સંચાર સાથી પોર્ટલની સત્તાવાર વેબસાઈટ
https://tafcop.sancharsaathi.gov.in/telecomUser/પર જાઓ. - મોબાઈલ નંબર દાખલ કરો: વેબસાઈટ પર તમારો હાલનો (જે તમારા નામે હોય) મોબાઈલ નંબર અને સ્ક્રીન પર દેખાતો કેપ્ચા કોડ દાખલ કરો.
- OTP વેરિફાય કરો: તમારા મોબાઈલ પર એક OTP આવશે. તે OTP ને વેબસાઈટ પર દાખલ કરીને વેરિફાય કરો.
- લિસ્ટ ચેક કરો: OTP વેરિફાય થતાં જ, તમારી સ્ક્રીન પર તમારા નામે રજિસ્ટર્ડ થયેલા તમામ મોબાઈલ નંબરોની સંપૂર્ણ યાદી દેખાશે.
અજાણ્યા કે નકામા નંબરને આ રીતે કરો રિપોર્ટ અને બ્લોક
એકવાર નંબરોની યાદી તમારી સામે આવી જાય, પછી દરેક નંબરની સામે તમને ત્રણ વિકલ્પો દેખાશે:
- Required (આ નંબર જરૂરી છે): જો નંબર તમારો છે અને તમે તેનો ઉપયોગ કરી રહ્યા છો.
- Not Required (આ નંબર જરૂરી નથી): જો નંબર તમારો છે, પરંતુ હવે તમે તેનો ઉપયોગ કરતા નથી.
- Not My Number (આ મારો નંબર નથી): જો તમે તે નંબરને ઓળખતા જ નથી અને તે તમારો નથી.
જો તમને લિસ્ટમાં કોઈ એવો નંબર દેખાય જે તમારો નથી, તો તેની સામે આપેલા “Not My Number” વિકલ્પને પસંદ કરો. ત્યારબાદ, નીચે આપેલા “Report” બટન પર ક્લિક કરો. તમારી ફરિયાદ નોંધાઈ જશે અને તે નંબરને બ્લોક કરવાની પ્રક્રિયા શરૂ થઈ જશે. આ સરળ પગલાં તમારી સુરક્ષા અને પ્રાઇવસી બંને માટે અત્યંત જરૂરી છે.