GSEB Exam Form 2026 : ગુજરાત માધ્યમિક અને ઉચ્ચત્તર માધ્યમિક શિક્ષણ બોર્ડ (GSEB) દ્વારા ફેબ્રુઆરી/માર્ચ 2026 માં લેવાનારી ધોરણ 10 (SSC) અને ધોરણ 12 (HSC) ની બોર્ડ પરીક્ષાઓ માટે ફોર્મ ભરવાની સત્તાવાર તારીખો જાહેર કરી દેવામાં આવી છે. રાજ્યભરના લાખો વિદ્યાર્થીઓ અને વાલીઓ માટે આ સૌથી અગત્યના સમાચાર છે.
બોર્ડ દ્વારા જાહેરાત કરવામાં આવી છે કે આ પરીક્ષાઓ માટેના આવેદનપત્રો આજથી, એટલે કે 7 નવેમ્બર, 2025 થી ઓનલાઈન ભરવાના શરૂ થશે. ફોર્મ ભરવાની છેલ્લી તારીખ 6 ડિસેમ્બર, 2025 રાખવામાં આવી છે. તમામ શાળાઓએ આ સમયગાળા દરમિયાન જ ફોર્મ ભરવાની પ્રક્રિયા પૂર્ણ કરવાની રહેશે.
બોર્ડની વેબસાઇટ પરથી ઓનલાઈન ફોર્મ ભરી શકાશે
તમામ શાળાઓના આચાર્યોએ બોર્ડની સત્તાવાર વેબસાઇટ gseb.org અથવા gsebeservice.com પરથી પોતાના વિદ્યાર્થીઓના આવેદનપત્રો ઓનલાઈન ભરવાના રહેશે. આ પ્રક્રિયા ધોરણ 10 (SSC), ધોરણ 12 સામાન્ય પ્રવાહ (HSC General), અને ધોરણ 12 વિજ્ઞાન પ્રવાહ (HSC Science) ના તમામ નિયમિત, રીપીટર, અને GSOS ના વિદ્યાર્થીઓ માટે ફરજિયાત છે.
ધોરણ 10 (SSC) માટે કેટલી ફી ભરવી પડશે?
ધોરણ 10 (SSC) ના વિદ્યાર્થીઓ માટે બોર્ડ દ્વારા નિયત કરાયેલ પરીક્ષા ફી નીચે મુજબ છે:
- નિયમિત વિદ્યાર્થી: ₹425/-
- નિયમિત રીપીટર (1 વિષય): ₹155/-
- નિયમિત રીપીટર (2 વિષય): ₹225/-
- નિયમિત રીપીટર (3 વિષય): ₹285/-
- નિયમિત રીપીટર (3 થી વધુ વિષય): ₹415/-
ધોરણ 12 (HSC) સામાન્ય પ્રવાહની ફી
ધોરણ 12 સામાન્ય પ્રવાહના વિદ્યાર્થીઓ માટે પરીક્ષા ફીનું માળખું નીચે મુજબ છે:
- નિયમિત વિદ્યાર્થી: ₹580/-
- નિયમિત રીપીટર (1 વિષય): ₹155/-
- નિયમિત રીપીટર (2 વિષય): ₹255/-
- નિયમિત રીપીટર (3 વિષય): ₹345/-
- નિયમિત રીપીટર (3 થી વધુ વિષય): ₹580/-
સામાન્ય પ્રવાહમાં પ્રાયોગિક વિષય માટે વિષયદીઠ ₹10/- (રૂપિયા દસ) વધારાની ફી રહેશે.
ધોરણ 12 (HSC) વિજ્ઞાન પ્રવાહની ફી
ધોરણ 12 વિજ્ઞાન પ્રવાહના વિદ્યાર્થીઓ માટે પરીક્ષા ફી નીચે મુજબ નક્કી કરવામાં આવી છે:
- નિયમિત વિદ્યાર્થી: ₹725/-
- નિયમિત રીપીટર (1 વિષય): ₹220/-
- નિયમિત રીપીટર (2 વિષય): ₹390/-
- નિયમિત રીપીટર (3 વિષય): ₹505/-
- નિયમિત રીપીટર (3 થી વધુ વિષય): ₹725/-
વિજ્ઞાન પ્રવાહના વિદ્યાર્થીઓએ પ્રાયોગિક વિષય માટે વિષયદીઠ ₹130/- (રૂપિયા એકસો ત્રીસ) ની ફી ચૂકવવાની રહેશે.
વિદ્યાર્થીનીઓ અને દિવ્યાંગ ઉમેદવારોને ફી માંથી મુક્તિ
સરકારશ્રીના આદેશ મુજબ, આ વર્ષે પણ તમામ વિદ્યાર્થીનીઓ (Girl Students) અને દિવ્યાંગ ઉમેદવારોને પરીક્ષા ફી માંથી સંપૂર્ણ મુક્તિ આપવામાં આવેલ છે. શાળાઓએ આ વિદ્યાર્થીઓના ફોર્મ ભરતી વખતે ફી ભરવાની રહેશે નહીં.
ખાસ નોંધ: છેલ્લી તારીખ ચૂકશો નહીં – GSEB Exam Form 2026
બોર્ડ દ્વારા સ્પષ્ટપણે જણાવવામાં આવ્યું છે કે ફોર્મ ભરવા માટેની છેલ્લી તારીખ 6 ડિસેમ્બર, 2025 છે. ઉપરોક્ત તમામ ફી માં લેઇટ ફી (Late Fee) નો સમાવેશ થતો નથી. તેથી, તમામ શાળાઓ અને વિદ્યાર્થીઓએ સમયસર પ્રક્રિયા પૂર્ણ કરવી હિતાવહ છે.